لاہور (22 جنوری 2026) ہائر ایجوکیشن کمیشن (ایچ ای سی) پاکستان نے سوشل میڈیا پر وائرل ہونے والے مبینہ نوٹیفکیشن کو مکمل طور پر جعلی قرار دے دیا ہے۔ اس دستاویز میں دعویٰ کیا جا رہا تھا کہ 17 جنوری 2026 سے پنجاب کے سرکاری اور نجی کالجوں/جامعات میں طلبہ کی حاضری کی شرط ختم کر دی گئی ہے، کم حاضری پر داخلہ یا امتحان نہیں روکا جائے گا اور نہ ہی کوئی سزا یا جرمانہ عائد ہوگا۔
ایچ ای سی نے فوری وضاحت جاری کرتے ہوئے کہا کہ اس جعلی نوٹیفکیشن کا کمیشن سے کوئی تعلق نہیں ہے۔ یہ گمراہ کن معلومات پھیلانے کی کوشش ہے، جس سے طلبہ اور تعلیمی اداروں میں غیر ضروری کنفیوژن پیدا ہو رہی ہے۔ نوٹیفکیشن میں بابًر خان گوندل کے نام سے دستخط بھی جعلی ہیں۔
کمیشن نے طلبہ، اساتذہ اور اداروں سے اپیل کی ہے کہ وہ غیر مصدقہ معلومات پر یقین نہ کریں، ایسی پوسٹس کو آگے شیئر نہ کریں اور درست معلومات کے لیے صرف ایچ ای سی کی آفیشل ویب سائٹ اور تصدیق شدہ سوشل میڈیا اکاؤنٹس سے رجوع کریں۔
یہ نوٹیفکیشن سوشل میڈیا پر تیزی سے پھیلا تھا، مگر اب ایچ ای سی کی تردید کے بعد طلبہ اور اداروں کو ہوشیار رہنے کی ضرورت ہے۔ حاضری کی شرط اب بھی نافذ ہے، اور اس میں کوئی تبدیلی نہیں کی گئی۔