جے پور (26 دسمبر 2025) راجستھان کی جے پور میں ایک نابالغ لڑکی سے مبینہ زیادتی کے مقدمے میں بھارتی کرکٹر یش دیال کو بڑا دھچکا لگا ہے۔ خصوصی عدالت نمبر 3 کی جج نے دیال کی قبل از گرفتاری ضمانت کی درخواست مسترد کر دی ہے اور کہا ہے کہ متاثرہ لڑکی کے بیان، شواہد اور مقدمے کے مجموعی حالات کو دیکھتے ہوئے ضمانت دینا مناسب نہیں۔ عدالت نے نابالغ سے متعلق مقدمات میں تحقیقات کے دوران زیادہ احتیاط اور حساسیت کی ضرورت پر زور دیا۔
مقدمہ جے پور کی ایک نابالغ لڑکی کی جانب سے درج کروایا گیا تھا، جس نے الزام لگایا کہ یش دیال نے کرکٹ کیریئر بنانے میں مدد کا جھانسہ دے کر طویل عرصے تک اس کا جنسی استحصال کیا۔ لڑکی کے مطابق ملزم نے خود کو ایک بااثر کرکٹر کے طور پر پیش کر کے اس کا جذباتی استحصال کیا، اور جب لڑکی نے مزاحمت کی تو اسے دھمکیاں دی گئیں اور رابطہ ختم کرنے کی کوشش کی گئی، جس کے بعد اس نے پولیس سے رجوع کیا۔
ملزم کے وکیل نے عدالت میں موقف اختیار کیا کہ الزامات جھوٹے ہیں اور تعلق رضامندی سے تھا، دیال اچھی شہرت کے حامل پیشہ ور کرکٹر ہیں اور کیس میں مکمل تعاون کرنے کو تیار ہیں۔ تاہم عدالت نے یہ دلائل تسلیم نہیں کیے۔
یہ واقعہ یش دیال کے کرکٹ کیریئر پر بھی اثر انداز ہو سکتا ہے۔ وہ رائل چیلنجرز بنگلور کی ٹیم کا حصہ ہیں اور آئی پی ایل 2026 کے لیے بھی برقرار رکھے گئے ہیں، جہاں انہیں گزشتہ سال 5 کروڑ روپے میں خریدا گیا تھا۔ مقدمے کی سماعت جاری ہے اور عدالت نے تحقیقات کو تیز کرنے کی ہدایت کی ہے۔
