پشاور (2 جنوری 2026) وزیراعلیٰ خیبرپختونخوا محمد سہیل خان آفریدی نے کہا ہے کہ پشاور کو ترقی دیں گے، لیکن لاہور جیسی نہیں جہاں جلسہ جلوس کرنے پر پابندی ہے۔ انہوں نے لاہور دورے میں غلط زبان کے استعمال کو “عمل کا ردعمل” قرار دیتے ہوئے کہا کہ اس پر معذرت کر لی ہے، اور دورہ عوام میں بیداری پیدا کرنے کے لیے تھا۔ وزیراعلیٰ نے کہا کہ جلد کابینہ میں توسیع کی جائے گی اور 100 دنوں کی کارکردگی عوام کے سامنے پیش کی جائے گی۔ کرپشن پر زیرو ٹالرنس پالیسی ہے، اور حکومت کے اصول شفافیت، میرٹ اور ترقی ہیں۔
انہوں نے وفاق پر تنقید کرتے ہوئے کہا کہ ضم اضلاع کے لیے 1000 ارب روپے میں سے 700 ارب سے زائد ابھی وفاق کے ذمہ بقایا ہیں، 7 سالوں میں صرف 168 ارب دیے گئے۔ وفاق اگر بقایا جات ادا کر دے تو سکولوں اور اسپتالوں میں سہولیات کی صورتحال بہتر ہو جائے گی۔ مخالفین 75 سالوں کی محرومیاں ہمارے کھاتے میں ڈالتے ہیں۔ امن و امان کی صورتحال قائم کرنا میری حکومت کا اصل چیلنج ہے۔
وزیراعلیٰ نے “آپ کا وزیراعلیٰ آپ کے ساتھ” کے عنوان سے آن لائن کھلی کچہریوں کا آغاز کر دیا، جس کی پہلی کچہری ضلع باجوڑ کے لیے منعقد ہوئی۔ اس میں عوامی شکایات خود سنیں اور 14 دن میں حل کرنے کے احکامات جاری کیے۔ یہ اقدام بانی چیئرمین عمران خان کے وژن پر مبنی ہے، جس کا مقصد عوام اور حکومت کے درمیان فاصلے کم کرنا ہے۔
