لاہور (12 دسمبر 2025، رات 9:14) پنجاب حکومت اور ٹرانسپورٹرز کے درمیان طویل مذاکرات بالآخر کامیاب ہو گئے، اور ٹرانسپورٹرز نے فوری طور پر ہڑتال ختم کرنے کا اعلان کر دیا۔ سینئر صوبائی وزیر مریم اورنگزیب کی سربراہی میں ہونے والے اجلاس میں ٹرانسپورٹرز کے تمام تحفظات سنے گئے اور ان کے حل کے لیے وزیراعلیٰ مریم نواز شریف کی ہدایت پر ایک اعلیٰ سطح کی کمیٹی تشکیل دے دی گئی، جس کی سربراہی خود مریم اورنگزیب کریں گی اور ٹرانسپورٹرز کے نمائندے بھی اس کا حصہ ہوں گے۔ کمیٹی کا پہلا اجلاس ہفتے کے روز ہوگا، جہاں ٹرانسپورٹ سیکٹر کے مسائل پر تفصیلی غور کیا جائے گا۔
پاکستان گڈز ٹرانسپورٹ الائنس کے مرکزی صدر حاجی شیر علی چوہدری سمیت محمد ریاض خان تاجک، چوہدری مقبول حسین، رانا طارق مشتاق، ملک اعجاز، ملک معروف، سیف شاہ دین گجر، فیصل بشیر بھٹی، ملک جاوید اور حاجی پرویز اعوان نے مصالحتی قرارداد پر دستخط کیے۔ مریم اورنگزیب نے ٹرانسپورٹرز کے فیصلے کا خیرمقدم کرتے ہوئے کہا کہ حکومت کا بنیادی مقصد انسانی جان کا تحفظ اور شہریوں کی زندگیاں بہتر بنانا ہے، اور ہم مسائل کو بات چیت سے حل کرنے پر یقین رکھتے ہیں۔ انہوں نے امید ظاہر کی کہ کمیٹی کے اجلاسوں سے ٹرانسپورٹ سیکٹر کے لیے دیرپا اور پائیدار حل نکلے گا۔
دوسری جانب کراچی چیمبر آف کامرس اینڈ انڈسٹری کے صدر محمد ریحان حنیف نے ہڑتال پر تشویش کا اظہار کرتے ہوئے کہا کہ کارگو کی مکمل بندش ملک کو سنگین تجارتی اور صنعتی بحران کی طرف دھکیل رہی ہے، درآمدی اور برآمدی مال بندرگاہوں، ہائی ویز اور صنعتی علاقوں میں پھنس گیا ہے، جس کے کاروبار، صنعتوں اور قومی آمدنی پر طویل المدتی تباہ کن اثرات پڑ سکتے ہیں۔ اب ہڑتال ختم ہونے سے امید ہے کہ سپلائی چین بحال ہوگی اور کاروباری سرگرمیاں دوبارہ تیز ہو جائیں گی۔
